«Хромтау тау-кен техникалық жоғары колледжі» МКҚК (Ақтөбе облысы) – Батыс Қазақстандағы техникалық және кәсіптік білім берудің көшбасшысы, тау-кен металлургия саласы (ТКМС) үшін жоғары білікті мамандар даярлайтын бейінді оқу орны.
Бүгінде колледжде 1242 студент білім алуда (697-сі – күндізгі бөлімде, 545-і – сырттай бөлімде). Студенттердің кәсіби дамуына арналған бірегей білім беру экожүйесі қалыптастырылған.
Инновациялық білім беру экожүйесі
Колледж дәстүрлі оқыту шеңберінен шығып, өңірдегі ірі білім беру хабына айналды:
- Тау-кен металлургия саласының өңірлік білім беру-өндірістік кластері. Колледж базасында кадрларды үздіксіз даярлаудың кешенді жүйесі қалыптастырылған. Бұл жүйе балабақша мен мектептердегі ерте кәсіптік бағдарлаудан бастап, колледждегі бейінді оқытуға және өндірісте кепілдендірілген жұмысқа орналасуға дейінгі барлық кезеңді қамтиды.
- ТКМС құзыреттілік орталығы. «Жас маман» республикалық жобасы аясында ашылып, заманауи жоғары технологиялық құрал-жабдықтармен жабдықталған.
- Мобильді оқу орталығы. Ауылдық шалғай елді мекен тұрғындарының сапалы кәсіптік білім алуына мүмкіндік беретін бірегей жоба.
- «ERG Skills» технологиялық алаңы. Колледж тау-кен ісі, пайдалы қазбаларды байыту, геодезия және маркшейдер ісі, дәнекерлеу технологиялары, слесарлық іс, өндірістік автоматика, зертханалық-химиялық талдау және электрмонтаж бағыттары бойынша салалық чемпионаттың ресми өңірлік базасы болып табылады.
Стратегиялық серіктестік және дуалды оқыту
- Өнеркәсіптік көшбасшының қамқорлығы. 2006 жылдан бері колледждің негізгі серіктесі – «Еуразиялық Топ» (ERG) құрамындағы «ТНК Казхром» АҚ-ның филиалы Дөң тау-кен байыту комбинаты (ДТКБК) болып табылады. Білім беру бағдарламалары ERG өндірістік кәсіпорындарының қажеттіліктеріне толық сәйкестендірілген.
- Студенттерге арналған әлеуметтік қолдау. ДТКБК жыл сайын мақсатты мемлекеттік тапсырыс қалыптастырады, өндірістік тәжірибеге ақы төлейді, студенттерді тегін тамақпен және арнайы киіммен қамтамасыз етеді, сондай-ақ түлектерді 100% жұмысқа орналастыруға кепілдік береді.
- Педагогтерді қолдау. Серіктес ұйым оқытушыларға материалдық қолдау көрсетіп, ынталандырушы үстемақылар белгілейді және өндіріс базасында тағылымдамалар ұйымдастырады.
- Дуалды оқыту. Дуалды білім беру жүйесіне күндізгі бөлімнің 523 студенті тартылған, бұл күндізгі бөлім контингентінің 75%-ын құрайды.
- Ғылыми-білім беру трансфері. Колледждің серіктестері қатарында Г.И. Носов атындағы Магнитогорск мемлекеттік техникалық университеті (ММТУ) және Халықаралық білім және инновациялар орталығы бар. Бұл әлемдік инженерлік стандарттарды оқу үдерісіне енгізуге мүмкіндік береді.
Халықаралық стандарттау (NCCER)
2024 жылы колледж NCCER (National Center for Construction Education and Research, АҚШ) халықаралық салалық аккредиттеуінен сәтті өтіп, жоғары дайындық деңгейін растады. Америкалық оқу модульдерінің енгізілуі «Электрика» бағыты бойынша техникалық кадрларды даярлау мен тәуелсіз біліктілік бағалауын халықаралық өнеркәсіптік қауіпсіздік және сапа талаптарына сәйкес жүргізуге мүмкіндік береді.
Жоғары марапаттар мен жетістіктер
Колледж мемлекеттік және халықаралық деңгейде білім беру көшбасшысы ретінде ресми мойындалған.
Қазақстан Республикасы Президентінің «Алтын сапа» сыйлығының Бас жүлдесі
2025 жылғы 5 желтоқсанда колледж Қазақстан Республикасы Президентінің «Алтын сапа» сыйлығының Бас жүлдесіне «Жылдың үздік колледжі» номинациясы бойынша ие болды. Бұл – ұлттық деңгейде колледждің білім беру моделінің тиімділігін айқындайтын ең жоғары мемлекеттік марапат.
Халықаралық мойындау
TurkicSkills-2025 I халықаралық чемпионаты (Ақтау қаласы) аясында Хромтау тау-кен техникалық жоғары колледжі Қазақстан Республикасының техникалық және кәсіптік білім беру ұйымдары арасында «Үздік тау-кен колледжі» деп танылды.
Кәсіби шеберлік чемпионаттарындағы жетістіктер
TurkicSkills-2025 халықаралық чемпионаты
- Алтын медаль – Талғат Арлан («Электромонтаж» құзыреттілігі);
- Үздік шеберлігі үшін медальон (Medallion for Excellence) – Дрижак Данил («Ұшқышсыз ұшу аппараттарының операторы» құзыреттілігі).
WorldSkills қозғалысы (Ұлттық деңгей)
WorldSkills Kazakhstan X Ұлттық чемпионатының финалында колледж құрамасы Ақтөбе облысының қоржынына 12 маңызды ұпай қосты:
- Алтын медальдар (I орын): Мырзабек Балғынбек («Өндірістік автоматика»), Дрижак Данил («Ұшқышсыз ұшу аппараттарын басқару»);
- Қола медальдар (III орын): Луконенко Тимофей мен Панин Денис («Мехатроника»);
- Кәсібилік үшін медальондар: Талғат Арлан («Электромонтаж»), Романенко Иван («Зертханалық химиялық талдау»).
Хромтау тау-кен техникалық жоғары колледжі – халықаралық деңгейде мойындалған білім беру стандарттары мен түлектердің 100% жұмысқа орналасуына кепілдік беретін, тау-кен металлургия саласының болашақ көшбасшыларын даярлайтын президенттік деңгейдегі сапалы оқу орны.
